Пожарот во ловиштето Јасен е делумно под контрола, изјави премиерот Христијан Мицкоски, кој денеска заедно со директорот на Дирекцијата за заштита и спасување беше во Ловиштето.
Веќе неколку дена вработените во Дирекцијата за заштита и спасување, припадниците на специјалните единици во МВР, но и Министерството за одбрана се борат со огнената стихија во Јасен.
– Можам да кажам дека делумно е под контрола, иако сѐ уште во позадина има огромни јазици на пламен, дејствуваат и воздухопловите, дејствуваат и ер тракторите заедно со хеликоптерите. Се надевам дека во најскоро време и овој пожар ќе биде ставен под целосна контрола. Во текот на вчерашниот ден на територијата на Македонија имавме околу 34 активни пожари, од кои 33 се изгаснати. Денеска немаме други активни пожари, но ситуацијата се менува од минута во минута – изјави Мицкоски.
Тој се заблагодари до сите оние кои што успешно се справуваат со огнените стихии.
– Се надевам дека ќе дојде крајот на овие огнени стихии, апелирам на однесување какво што треба во рамки на движењето по шуми, иако тоа е забрането. Од очевидци можам да кажам дека оваа огнена стихија е настаната од удар на гром според тоа што го слушнавме овде – рече Мицкоски и додаде дека борбата со огнената стихија во ловиштето Јасен продолжува.
