Потрошувачка на електрична енергија колку 35.000 домаќинства годишно

Топ Вести - Слушај сега

Едно поединечно барање до ChatGPT преку моделот GPT-4o троши околу 0,43 ват-часови електрична енергија, а ако се земат предвид околу 700 милиони барања дневно, вкупната потрошувачка на годишно ниво е еквивалентна на потрошувачката на 35.000 американски домаќинства.

- Advertisement -

Покрај тоа, ваквиот обем на користење подразбира и потрошувачка на вода за пиење доволна за околу 1,2 милиони луѓе, како и емисии на јаглерод диоксид што би ги апсорбирала шума со големина на Чикаго.

Овие податоци се наведени во најновото издание на билтенот за макроекономска анализа и трендови (MAT) на Стопанската комора на Србија, во анализата насловена „Вештачката интелигенција и глобалната трка за енергија, вода и метали“, чија авторка е Катарина Станчиќ.

Во анализата се посочува дека секоја интеракција со вештачка интелигенција се потпира на огромна физичка инфраструктура, сервери со висока потрошувачка на струја, комплексни системи за ладење, чипови направени од ретки метали, како и километри бакарни кабли и силициумски плочки кои ги поврзуваат центрите за податоци во глобална мрежа.

Авторката укажува на парадоксот на вештачката интелигенција, таа истовремено е и еден од најголемите потрошувачи на енергија, но и потенцијална алатка за поефикасно управување со ресурсите.

Иако ВИ-системите трошат огромни количини електрична енергија, тие истовремено нудат решенија за оптимизација на потрошувачката, паметно управување со мрежите и намалување на загубите.

Во некои земји веќе се применуваат креативни решенија за намалување на еколошкиот отпечаток. Во Хелсинки и Стокхолм, топлината што ја создаваат серверите се користи за централно греење на станбени објекти, додека во Исланд, благодарение на ладната клима и геотермалната енергија, центрите за податоци функционираат речиси во целосно одржлив систем.

Сепак, технолошкиот напредок носи и нови предизвици. Новите генерации чипови, како „Blackwell“ серијата на „Nvidia“ или „TPU“ процесорите на „Google“, овозможуваат извршување на повеќе операции од кога било досега, но истовремено отвораат простор за уште повеќе апликации, корисници и пазари.

Резултатот, според анализата, е контрадикторен, системите стануваат „попаметни“, но вкупната потрошувачка на енергија и ресурси продолжува да расте.

Проценките на Меѓународната агенција за енергија (IEA) покажуваат дека центрите за податоци веќе трошат околу 1,5 проценти од светската електрична енергија, што е на ниво на вкупната потрошувачка на Обединетото Кралство.

До крајот на деценијата, побарувачката за електрична енергија во центрите за податоци би можела да се удвои, при што главен двигател ќе биде токму развојот и ширењето на вештачката интелигенција.