Полицијата поднесе кривична пријава против две вработени во Управни работи во Куманово за несовесно работење во службата

Полицијата поднесе кривична пријава против две вработени во Управни работи во Куманово за несовесно работење во службата.

„СВР Куманово поднесе кривична пријава против М.А.(43) од Куманово и М.И.(41) од село Липково, поради постоење основи на сомнение дека сториле кривично дело Несовесно работење во службата, по член 353-в од Кривичниот законик. М.А. – вработена на работно место помлад референт за управни работи во Отсек за управни работи Куманово, на 30.8.2017 година примила барање за издавање на патна исправа поднесено од Х.Ј.(50) од Косово, по што во системот, во задолжителниот дел за потполнување од приложена важечка лична карта или друг важечки јавен документ во графата ја внела само таксата, без ниту еден личен податок. Потоа, извршила фотографирање за издавање на патна исправа на лицето Х.Ј.(50) од Косово без приложен важечки личен документ за идентификација со внесување и искористување на податоци на идентитет од друго лице и на тој начин му овозможила да се стекне со лажен идентитет и патна исправа од РСМ“, соопшти полицијата.

Второпријавената М.И., вработена на работно место помлад советник за управни работи во Отсек за управни работи Куманово, пропуштила да изврши должен надзор и на тој начин извршила повреда на законските прописи за издавање на патна исправа, се додава во соопштението.

- Advertisement -

„На 30.8.2017 година таа го одобрила барањето за изготвување на патна исправа за лицето Х.Ј. со внесени податоци од идентитет на друго лице“, соопшти полицијата.