Полицијата одзеде возила, фати пијани возачи и лица без возачка

Во периодот од 18:00 до 02:00 часот на 9/10 август 2025 година, полициски службеници од СВР Скопје спроведоа зајакната акциска контрола во сообраќајот и одржување на јавниот ред на подрачјето на град Скопје. При контролата се констатирани вкупно 99 сообраќајни прекршоци.

Од нив, 11 возила беа подигнати со специјалното возило „Пајак“, а две возила се одземени поради предизвикување голема бучава. Исто така, приведени се две малолетни лица поради незастанување на даден знак „Стоп“ и возење без возачка дозвола. Четири лица се лишени од слобода откако кај нив биле пронајдени наркотични средства.

Во соработка со инспектори за животна средина, беше извршено мерење на јачината на бучавата во угостителски објекти, при што два објекти во централното градско подрачје беа санкционирани за нарушување на јавниот ред и мир со пуштање гласна музика. На овие објекти им се изготвени записници за констатираните прекршоци.

- Advertisement -

Покрај тоа, во текот на вечерта беше извршена и контрола на угостителски објекти во координација со Државниот пазарен инспекторат, при што се провери документацијата на објектите.

Полицијата најавува дека ваквите контроли ќе продолжат со цел зголемување на безбедноста и редот во главниот град.