Поголемиот дел од вработените во Еврозоната не би се согласиле да им се намали платата во замена за погодноста за работа од дома

Поголемиот дел од вработените во Еврозоната не би се согласиле да им се намали платата во замена за погодноста за работа од дома, според анкета објавена денес од Европската централна банка (ЕЦБ).

Според извештаите, дури 70% од работниците би одбиле какво било намалување на платите во замена за можноста да работат 2-3 дена во неделата од дома.

Приближно 13% од вработените би прифатиле намалување на платата од 1 до 5%, додека 8% би се согласиле на намалување на платата од 6 до 10%.

- Advertisement -

Хибридниот модел на работа, во кој вработените работат од дома во просек 2-4 дена во неделата, го користат речиси 22% од вработените во еврозоната, но тие се подготвени да прифатат намалување на платата од само 2,6% во просек.

Тоа е значително помалку отколку во САД или Германија, каде што претходните анкети покажаа дека вработените се подготвени да се откажат од 5 до 7% од својата заработка за да ја задржат опцијата за работа од дома.

Во Еврозоната, вработените со деца и оние кои патуваат долго време до работа најмногу го ценат хибридниот модел на работа, а во практика го користат повеќе помладите отколку постарите работници.

Многу работници кои целосно работат од дома, сепак признаваат дека би сакале да поминат повеќе денови во канцеларија, што покажува дека работењето од дома носи и предизвици како што се изолација или намален контакт со колегите.

Според Евростат, уделот на вработени на возраст од 20-64 години кои барем понекогаш работеле од дома се дуплирал помеѓу 2019 и 2024 година, од 11,7% на 22,4%.