Последниот преживеан од експедицијата што успеа да се искачи на Монт Еверест за прв пат во историјата во 1953 година, Канча Шерпа, почина на 92-годишна возраст, објави неговото семејство.
„Тој не се чувствуваше добро во последните неколку дена. Почина“, рече еден од неговите внуци.
Роден во 1933 година, Канча Шерпа имал 19 години кога бил вработен како носач во тимот предводен од Новозеланѓанецот Едмунд Хилари, првиот човек што се искачи на Еверест на 29 мај 1953 година, заедно со Непалецот Тензинг Норгај.
За време на тоа искачување, младиот носач Канча Шерпа успеал да стигне до „зоната на смртта“, област над 8.000 метри, без никакво претходно искуство во планинарење.
„Извор на инспирација“
„Тој беше жива легенда и извор на инспирација за сите планинари и сите оние кои работеа во секторот“, рече претседателот на Непалското планинарско здружение, Фур Гелџе Шерпа. „Го изгубивме нашиот старател“, додаде тој.
Членовите на експедицијата од 1953 година потоа се собраа во непалскиот главен град Катманду и мораа да пешачат до базниот камп на Еверест носејќи шатори, храна и опрема.
„Сите мораа да пешачат затоа што немаше патишта, немаше возила и немаше авиони“, изјави Канча Шерпа за АФП во интервју од 2013 година.
По експедицијата од 1953 година, Канча Шерпа продолжи да учествува во бројни експедиции дваесет години, пред да се откаже на инсистирање на неговата сопруга.
Потоа водеше хотел во Намче, град на патот кон базниот камп и Еверест, и основа фондација за финансирање на образованието на сиромашните семејства.
