По најновиот бран ирански ракетни напади, израелскиот министер за одбрана Израел Кац изјави дека врховниот лидер на Иран, Али Хамнеи, „не може да продолжи да постои“.
– Диктатор како Хамнеи, кој управува со земја како Иран и го направил уништувањето на Израел своја мисија, не може да продолжи да постои – рече Кац.
Тој додаде дека израелската војска добила инструкции и знаела дека „за да ги постигне сите свои цели, овој човек апсолутно не треба да продолжи да постои“, пренесе хрватски Индекс.
Изјавата доаѓа откако американските претставници објавија претходно оваа недела дека Доналд Трамп ставил вето на израелскиот план за атентат врз Хамнеи. Трамп подоцна изјави дека нема планови за таков потег, „барем не засега“.
Најмалку 240 лица се ранети во иранските ракетни напади утрово, објави Асошиејтед Прес, повикувајќи се на израелското Министерство за здравство. Четири лица се сериозно повредени, додека огромното мнозинство се здобило со полесни повреди, вклучувајќи повеќе од 70 лица во болницата Сорока во јужниот град Бершеба, каде што можеше да се види чад како се издига од комплексот додека службите за итни случаи ги евакуираа пациентите, според извештајот.
Исто така, иранска ракета погоди основа на облакодер на улицата Жаботински во Рамат Ган во Тел Авив, недалеку од центарот на градот.
