Инцидент се случи за време на летот од американскиот град Сан Франциско до Нади, главниот остров Фиџи. Две стјуардеси на Фиџи Ервејс минатата сабота ја залепиле устата на лута патничка, која, како што рекле патниците, била пијана и кажувала вулгарни работи.
Некои патници го снимиле целиот инцидент на своите мобилни телефони и снимката ја објавиле на социјалните мрежи. На снимката се гледа решителната интервенција на стјуардесата за смирување на 69-годишната патничка, вклучувајќи го и моментот кога ѝ ја затвораат устата со селотејп.
Агресивната патничка била пречекана од локалната полиција во Нади по слетувањето и била уапсена. Патниците рекле дека персоналот на летот бил „принуден да држи жена која се жалела и да ѝ ја залепи устата“ бидејќи таа кажувала „расистички и вулгарни“ работи, објави Њујорк пост.
Еден патник објаснил дека ситуацијата ескалирала на половина пат од 11-часовниот лет, кога патничката наеднаш станала гласна. Нејзиниот сопруг потоа побарал од стјуардесата да седне на друго место, што стјуардесата му дозволила, а расправијата меѓу жената и екипажот започнала бидејќи стјуардесите одбиле да ѝ кажат каде седи нејзиниот сопруг.
Покрај вербалните напади, жената наводно ги навредувала стјуардесите, фрлала чаши кон нив, а едната ја удрила по рака. Ескалацијата на ситуацијата го принуди екипажот да преземе драстични мерки за да се осигура безбедноста на сите патници и да продолжи летот без дополнителни инциденти.
– Многу патници беа особено вознемирени од расистичките коментари на жената кон членовите на екипажот од Фиџи – се сеќава еден патник, додавајќи дека некои родители ги покриле ушите на своите деца.
– Бидејќи патничката не се смири, екипажот на крајот насилно ја однесе жената до задниот дел од авионот. Оттаму, таа продолжи да се однесува недолично во текот на остатокот од летот – раскажува сведокот.
Портпаролот на полицијата на Фиџи изјави дека жената била пијана и ги малтретирала другите патници. За нејзиното однесување е казнета со 500 долари.
