Паднаа две оставки по објавените материјали од државна секретарка

Топ Вести - Слушај сега

Експлицитни фотографии и снимки од секретарка во министерство отворија афера во Црна Гора. Поранешниот шеф на тајната служба АНБ тврди дека неговиот мобилен телефон бил злоупотребен, додека материјалите се проширија во јавноста.

- Advertisement -

Поранешниот директор на АНБ и поранешен советник за безбедност на претседателот, Дејан Вукшиќ, и државната секретарка во Министерството за човекови и малцински права, Мирјана Пајковиќ, поднесоа оставки по објавувањето на 18 експлицитни видеоснимки.

И двајцата наведоа лични причини и тврдат дека се жртви во случајот, додека Агенција за национална безбедност јавно се дистанцира од каква било поврзаност со аферата.

Сè почнало со украден телефон?

Вукшиќ тврди дека клучот на целиот случај е кражбата на неговиот мобилен телефон во октомври 2024 година. Според него, телефонот бил нелегално земен од Пајковиќ и подоцна злоупотребен.

– Ги отфрлам сите неточни и тенденциозни обвинувања. Првпат ги видов овие содржини дури кога почнаа нелегално да циркулираат на социјалните мрежи – соопшти Вукшиќ.

Тој нагласи дека не учествувал ниту во создавање, ниту во дистрибуција на видеоснимките, додавајќи дека со кражбата му била грубо нарушена приватноста.

Аудио снимка и тврдења за закани

Во јавноста се појави и аудиоснимка на која, според Пајковиќ, Вукшиќ ѝ се заканува. Тој признава дека разговорот постоел, но тврди дека бил реакција на кражбата и злоупотребата на неговиот телефон.

– Зборовите што ѝ ги упатив беа непосредна реакција на кражбата и не можат да бидат доказ за кривично дело – наведе тој.

Вукшиќ тврди дека повикот бил направен од фиксен телефон во кабинетот на претседателот Јаков Милатовиќ, а аудиото подоцна било објавено селективно и со временско задоцнување од повеќе од една година.

Уцена од непознат број

Според Вукшиќ, во март 2025 година добил пораки од непознат број со видео и закани, со цел да се повлече од кандидатурата за судија на Уставниот суд. Поради тоа поднел пријава до полицијата против Пајковиќ и непознати лица.

Тој тврди дека подоцна бил контактиран со барање да „помогне“ околу нејзини ангажмани, што го протолкувал како нов обид за уцена поврзана со нејзината номинација за омбудсман.

– Сè е темпирано за моја дискредитација – истакна Вукшиќ.

Тој најави полиграфско тестирање и тужби против сите кои, според него, го лажно обвиниле.

„Цела Црна Гора ќе ги види“

Пајковиќ, пред оставката, поднесе 3 кривични пријави за неовластено ширење експлицитна содржина. Таа изрази сомнеж дека Вукшиќ, користејќи ја својата поранешна позиција, ѝ се заканувал со компромитирачки материјал.

Како доказ доставила аудиоснимка на која, според неа, се слуша закана дека „цела Црна Гора ќе ги види“ нејзините снимки.

Црногорската АНБ се оградува, обвинителството без став?

АНБ соопшти дека приватната преписка и содржината што циркулираат не се предмет на нивен интерес и не можат да се поврзат со агенцијата. Обвинителството засега не се огласило.

Во Црна Гора, неовластеното ширење интимни снимки, познато како „порнографија за одмазда“, е кривично дело казниво со затвор до 5 години, а ако е сторено против дете, од 2 до 10 години.