Основното јавно обвинителство Скопје покрена постапка против сопственикот и управител на угостителскиот објект „Јужна пруга“ во Скопје, откако, и покрај изречената забрана за работа, локалот продолжил да прима гости

Топ Вести - Слушај сега

Основното јавно обвинителство Скопје покрена постапка против сопственикот и управител на угостителскиот објект „Јужна пруга“ во Скопје, откако, и покрај изречената забрана за работа, локалот продолжил да прима гости.

- Advertisement -

Според Обвинителството, на објектот претходно му била изречена забрана за вршење дејност од овластен инспектор за животна средина од Општина Аеродром, а решението било јасно истакнато на влезната врата. Наместо да ја почитува одлуката, сопственикот го отстранил службениот знак и продолжил со работа.

„При контролата беше констатирано дека угостителскиот објект работи и покрај забраната и дека во него има присутни гости“, информираат од Основното јавно обвинителство Скопје.

Со ваквото постапување, како што наведуваат од Обвинителството, осомничениот покажал целосно непочитување на службените акти и ја нарушил функцијата на институциите задолжени за надзор.

„Симнувањето на службениот знак и продолжувањето со работа претставува директно попречување на работата на државните и јавните институции“, појаснуваат од ОЈО.

Поради основано сомнение дека е сторено кривичното дело симнување и оштетување на службен печат или знак, јавниот обвинител побарал од Судот да му бидат изречени мерки на претпазливост.

„Побарана е забрана осомничениот да врши угостителска дејност, како и целосно спроведување на решението на надлежните инспекциски служби, сè додека трае кривичната постапка“, додаваат од Обвинителството.

Постапката е во тек, а од ОЈО Скопје порачуваат дека непочитувањето на законите и инспекциските одлуки ќе биде санкционирано.