Унгарскиот премиер Виктор Орбан ја исмеа изјавата на највисокиот дипломат на ЕУ, Каја Калас, за континуираната европска поддршка за Украина. Тој одговори на коментарот на Калас која претходно рече дека ЕУ и Украина мораат да бидат вклучени во преговорите со Русија за крај на војната.
– Позицијата на Брисел, да поддржува убиства онолку долго колку што е потребно, е морално и политички неприфатлива. Додека претседателот Доналд Трамп и претседателот Путин преговараат за мир, претставниците на ЕУ даваат безвредни изјави – рече Орбан.
Претходно, Калас изрази загриженост за изјава на Трамп дека ќе се сретне со Путин во Саудиска Арабија, изјава која повеќе европски дипломати ја оценија како заобиколување на Европа во процесот.
– Јасно е дека ниту еден договор зад нашиот грб нема да успее. Ви требаат и Европејците и Украинците. Зошто ѝ даваме на Русија сè што сака уште пред да започнат преговорите? Тоа е политика на попуштање. Никогаш не функционирала – им рече на новинарите Калаж на маргините на состанокот на министрите на НАТО.
Зеленски вчера повтори дека нема да прифати никаков мировен договор без директно учество на Украина во преговорите. На крајот од самитот на министрите за одбрана на НАТО во Брисел, американскиот секретар за одбрана Пит Хегсет се обиде да ги увери сојузниците, нагласувајќи дека „и Русија и Украина“ ќе учествуваат во преговорите.
Минхенската безбедносна конференција може да биде горчлива за Европејците бидејќи нашироко ќе се зборува за зголемување на трошењето за одбрана на земјите членки на НАТО. Истовремено, западните медиуми пишуваат дека е можно на конференцијата да биде претставен нацрт-планот на Трамп за мир во Украина.
Еден европски дипломат ја сумираше загриженоста на многумина кои се сомневаат во способноста на Трамп да преговара со Путин.
– Многумина стравуваат дека Трамп е несмасен преговарач и дека ќе направи неверојатни отстапки за Русија. Општиот впечаток е дека Американците внесуваат хаос во целиот процес – рече дипломатот кој сакаше да остане анонимен.
