Охрид, градот под заштита на УНЕСКО и перлата на македонскиот туризам, повторно станува жртва на безобразлук и неконтролирана комерцијализација. Најновиот скандал го потпишува Казино „Фламенго”, кое со герилска тактика во рани утрински часови го окупираше влезот на охридското пристаниште, претворајќи го во коцкарска промотивна арена.
Ноќна герила во стил на оперативни криминалци
Околу 2 часот наутро, „герилците” на Казино „Фламенго” од Македонски Брод спровеле акција која по својата бесрамност и дрскост нема преседан во охридската историја. Во мрак, како што работат сомнителните структури, поставиле постамент, го издигнале возило и околу него изградиле кавез со рекламни електрични панои.
Што е уште поскандалозно – рекламните панои нелегално ги приклучиле на уличното осветлување на Општина Охрид, што практично значи дека граѓаните на Охрид ја плаќаат сметката за рекламирање на коцкањето.
Блокада на пристаништето
Локацијата која си ја одбрале овие „бизнисмени” е особено провокативна – влезот на охридското пристаниште, симболот на градот и негова главна туристичка артерија. Пролазот за граѓани е сведен на жалосни еден метар од двете страни, што практично претставува блокада на јавниот простор.
Изборот на оваа локација не е случаен. Се работи за најекспонирано место во градот, видливо од сите страни – од копно и од вода. Оваа тактика на присвојување на јавниот простор за лични профити потсетува на најмрачните периоди од историјата кога окупаторите најпрвин ги заземаа стратегиските локации.
Институционална глувост и слепост
Најтрагичното во целава приказна е мртвата тишина на надлежните институции. Општина Охрид, Министерството за култура, инспекциските служби – сите се прават глуви и слепи пред овој скандал. Јавните критики и возмутеноста на граѓаните не допираат до нив, како да живеат во паралелна реалност каде што коцкарските лоби се позначајни од достоинството на градот.
Неспојлив со UNESCO статусот
Охрид, како град под заштита на UNESCO, има обврска да го зачува својот културно-историски идентитет. Претворањето на централните градски локации во коцкарски рекламни простори е директно спротивно на овој статус. Ова не е само прашање на естетика, туку на основни принципи на урбанизам и културно наследство.
Повик за итна реакција
Општина Охрид мора итно да ја отстрани оваа грда слика која го срами градот пред домашните и странските посетители. Нелегалното приклучување на електричната мрежа, заземањето на јавниот простор и визуелното загадување мора да бидат санкционирани според законот.
Граѓаните на Охрид не смеат да молчат пред ваквиот безобразлук. Времето е да се каже гласно: Охрид не е на продажба, а неговиот центар не смее да биде претворен во коцкарска арена!
Ако надлежните институции и понатаму ќе ја игнорираат волјата на граѓаните, тогаш јасно е дека нивниот приоритет не се интересите на градот, туку интересите на сомнителните структури што го уништуваат угледот на нашиот најубав град.
Сашо Денесовски
