Општина Дебарца со нови мерки: Субвенции за бизниси, млади и млади семејства

Општина Дебарца за прв пат воведе низа конкретни финансиски мерки насочени кон поддршка на локалната економија, младите и младите семејства, најави градоначалникот Златко Сиљаноски.
За прв пат во историјата на општината исплатени се субвенции за правни лица кои вршат трговија на мало, односно за локалните продавници, и тоа за периодот јануари, февруари и март. Мерката претставува директна поддршка на малите бизниси кои се столбот на локалната економија во Дебарца. На правните лица кои до сега доставиле барања веќе им е извршена исплата, а повикот останува отворен до крајот на годината.
Исто така за прв пат се исплатени субвенции за полагање на возачки испит од Б категорија наменети за млади до 21 година кои се жители на општината. Износот на субвенцијата е 20.000 денари по барател и е насочен кон зголемување на мобилноста и независноста на младите луѓе кои живеат и остануваат во Дебарца.
Третата новина е воведувањето на еднократна финансиска помош за склучување на брак во износ од 30.000 денари по барање, под услов едниот од сопружниците до денот на склучување на бракот да не наполнил 30 години. Мерката е насочена кон поттикнување на младите да остануваат во општината и кон поддршка на новите семејства во нивните први чекори.
Сите повици се отворени до крајот на годината, а Општина Дебарца повикува сите заинтересирани граѓани и правни лица да поднесат барање во предвидените рокови.