Од утре на хрватскиот автопат А3 помеѓу Поповача и Новска ќе започне инсталацијата на првите 7 портали од новиот систем за наплата на патарините во Хрватска. Системот „Crolibertas“ е целосно дигитален и уникатен систем за електронска наплата на патарина, објавија тамошните медиуми.
На самата траса на автопатот ќе бидат лоцирани 3 портали и тоа на делниците Поповача – Кутина, Кутина – Липовљани и Липовљани – Новска, додека преостанатите 4 ќе бидат монтирани на влезовите на автопатот, на местата на сегашните патарини.
„Хрватските автопати“ ги предупредија возачите за привремено регулирање на сообраќајот и можно затворање на лентата за запирање или возење, а најсложените работи, како што е поставувањето попречни греди на порталот, ќе се извршуваат ноќе со цел да се минимизира влијанието врз сообраќајот.
Системот ќе биде воведен на сите автопати во Хрватска, кои ги управуваат „Хрватски автопати“ (HAC), Бина Истра и Автоцеста Загреб-Мацељ. Тој се базира на концептот на возење без запирање, во слободен проток на возила, што им овозможува на корисниците да патуваат по автопатите побрзо, поедноставно и помодерно.
Камерите и сензорите автоматски ги идентификуваат возилата, а возачите можат да изберат помеѓу две опции за плаќање: користење на постојните ENC уреди (таг уреди), кои ќе бидат задолжителни за тешки товарни возила над 3,5 тони, или системот за автоматско препознавање на регистарски таблички (APRP), каде што патарината ќе се наплаќа подоцна.
Системот ќе биде компатибилен и со европските EENC уреди, што ќе го олесни патувањето за странските возачи.
Воведувањето на Crolibertas е исклучително тежок проект, кој вклучува инсталација на вкупно 212 портали низ целата автопатска мрежа, инсталација на напредна ИТ опрема и воспоставување центри за обработка на податоци.
