Од понеделник блокада на границите кон ЕУ

Топ Вести - Слушај сега

Новите правила за влез во шенген зоната не решаваат ништо за подобрување на определена област во ЕУ, а нам ни создаваат сериозни проблеми. Тие ќе влијаат многу лошо врз бизнисот. Мислам дека се најавени сериозни протести и од понеделник се очекува реакциите да се прошират во сите земји погодени од ваквата одлука, рече вчера претседателот на Стопанската комора, Бранко Азески.

- Advertisement -

Одговарајќи на новинарско прашање, Азески истакна дека очекува повлекување на новите правила, но не наскоро.

Како што информира тој, особено е жесток и критичен тонот на странските инвеститори во Македонија кои и вчера биле во претставништвото на ЕУ да реагираат.

– Мислам дека работата ќе добие многу лош тек зашто се преговара поединечно со секоја земја и тоа е став на ЕУ, не заеднички. Ние се обидовме преку нашите релевантни заеднички претставнички тела на Балканот да го актуелизираме ова прашање уште пред шест месеци, но тешко наоѓавме соговорници за тоа. Единствено: „нема промена на одлуката, ние ќе преговараме со секој поединечно“. Но, тоа „секој поединечно“ значи да немаш преглед на ситуацијата. Ние упативме писмо до претседателката на Европската комисија, а информиран сум од Владата дека и премиерот лично ќе оди во Брисел и ќе разговара за ова прашање зашто мислиме дека е исклучително важно и не решава ништо за подобрување на определена област во ЕУ, а создава сериозни проблеми за нас. Очекуваме од понеделник реакциите да се прошират во сите земји погодени од ова. Не очекувам брзо решение, но очекувам повлекување на одлуката – потенцира Азески.

Доколку се реализира најавата на превозниците од Западен Балкан, в понеделник во земјава ќе се затворат за товарен сообраќај граничните премини: Деве Баир, Делчево, Ново Село, Дојран, Богородица, Меџитлија, Ќафасан, Блато и Блаце, а Табановце – Прешево ќе биде затворен од српска страна.