Обилните дождови што утрово ја зафатија општина Будва предизвикале масовно поплавување на улиците и се заканиле со неколку населени места. Три екипи на Службата за заштита и спасување биле испратени веднаш на терен. Големата количина врнежи го отежнала нормалното одвивање на сообраќајот, јавија црногорските медиуми.
Граѓаните се јавувале во надлежните служби, пријавувајќи поплави што го попречуваат секојдневното движење и активностите. Еден читател изјавил дека поројната вода поместила неколку автомобили, додека водата незапирливо течела по градските улици, пренесува РТВ Будва.
Меѓу најкритичните подрачја е населбата Лази, каде што беа поплавени станови.
Во текот на изминатите неколку часа, поради обилните врнежи од дожд, реката Грѓевица надојде, поплавувајќи ги возилата што возачите ги оставија синоќа во нејзиното корито. Коритото на реката, која летно време е сува се претвора во најголемиот паркинг во центарот на Будва.
Грѓевица пресушува во поголемиот дел од годината, па нејзиното корито, особено во летните месеци, се претвора во паркинг за стотици автомобили, бидејќи практично нема паркинг во Будванското поле, а изградени се стотици згради и куќи.
Според фотографиите од возачите објавени на Viber групата „Патрола ЦГ“, сообраќајот е отежнат од Будва до Јаз, каде што обилните дождови создадоа порои.
Од Службата за заштита и спасување информираат дека повеќе населени места се погодени, а како клучна причина за излевањето се наведува блокирањето на каналите за одводнување на атмосферските води, што го спречува нормалното истекување на врнежите.
