Демонстрантите кои се противат на апсењето на градоначалникот на Истанбул, Екрем Имамоглу, четврта ноќ по ред одржуваат протести во тој град, во Измир и турскиот главен град Анкара.
Некои учесници на протестот нападнаа полицајци, а во Анкара полицаец беше повреден во напад на маскирани лица.
Полицијата пукаше со гумени куршуми кон демонстрантите, јави ТРТ Хабер.
Организатор на протестите е главната турска опозициска Републиканска народна партија (ЦХП).
Имамоглу од притвор ги повика турските граѓани да одржат масовни демонстрации низ целата земја бидејќи е принуден во затвор да чека да почне неговото судење.
Турското Министерство за внатрешни работи соопшти дека Имамоглу е сменет од функцијата откако бил уапсен под обвинение за корупција и тероризам.
Градскиот совет на Истанбул, каде што ЦХП има мнозинство, се очекува да избере вршител на должноста градоначалник во наредните денови.
Имамоглу е клучна опозициска фигура и потенцијален противкандидат на турскиот претседател Реџеп Таип Ердоган на претседателските избори.
Тој беше приведен во средата под обвинение за корупција и помагање на терористичка група, но тој ги негираше обвиненијата, нарекувајќи ги „незамислива клевета“.
Турската влада негираше какво било влијание врз апсењето на Имамоглу, наведувајќи дека судството е независно.
Имамоглу (54), кој според некои анкети има поголема поддршка од јавноста од Ердоган, требаше да биде именуван за официјален кандидат на ЦХП на претстојните претседателски избори.
Градежна компанија, фудбалски клуб – и сега забрана за политичка дејност
Роден во 1970. година, Екрем Имамоглу студирал на Кипар и во Истанбул, каде што се стекнал со диплома за бизнис администрација. Пред да влезе во политиката, тој водел еден ресторан во Истанбул, специјализиран за ќофтиња. Ја водел и градежната фирма на неговото семејство, Имамоглу Инсаат. Од 2002. до 2003. година беше член на управниот одбор на Трабзонспор, клубот од неговиот роден град и еден од најуспешните турски фудбалски клубови.
Гледајќи наназад во минатото на претседателот Ердоган и Имамоглу, може да се извлечат многу паралели меѓу двајцата мажи. Имено, и двајцата во младоста биле успешни фудбалери. И двајцата потекнуваат од регионот на Црното Море. Во традиционално конзервативниот Трабзон, каде што израснал Имамоглу, тој посетувал и т.н. курс за Куранот, односно се стекнал со веронаука. Од 2019. година, Имамоглу е градоначалник на Истанбул, функција која Ердоган ја извршуваше меѓу 1994 и 1998 година. Во 2019. година, по поништените избори, Имамоглу во својот говор рече дека „нашиот пат е долг“. Без разлика на исходот од судската постапка, Имамоглу ќе остане влијателен политичар. Можеби и „навистина сè ќе биде убаво“. Но, се чини дека неговиот пат сè уште е долг и трнлив.
