Израелскиот премиер Бенјамин Нетанјаху денеска објави дека се откажал од идејата да го назначи Ели Шарвит за нов директор на Агенцијата за внатрешна безбедност (Шин Бет) по критиките на неговиот кандидат од страна на влијателниот американски сенатор Линдзи Греам.
Кабинетот на израелскиот премиер соопшти дека Нетанјаху му се заблагодарил на вицеадмиралот Ели Шарвит што одговорил на неговата покана да ја прифати функцијата, но го информирале дека по дополнително разгледување, има намера да разгледа и други кандидати.
Оваа ненадејна промена дојде откако номинацијата на адмирал Шарвит за лидер на Шин Бет беше критикувана во САД од републиканскиот сенатор Линдзи Греам, близок до американскиот претседател Доналд Трамп.
Греам рече дека ако е вистина дека Америка нема подобар пријател од Израел, номинацијата на Ели Шарвит за нов шеф на Шин Бет е повеќе од проблематична.
„Мојот совет до моите израелски пријатели е да го променат својот став и подетално да го проучат минатото на нивниот кандидат“, рече Греам, посочувајќи на изјавите на адмирал Шарвит за претседателот Трамп и неговата политика, која, како што оцени, „ќе создаде непотребни тензии во критично време“.
Нетанјаху во понеделникот ја објави номинацијата на Ели Шарвит за шеф на Шин Бет, иако Врховниот суд на земјата го замрзна разрешувањето на вршителот на должноста шеф на агенцијата, Ронен Бар.
Одлуката на Нетанјаху да го разреши Бар, во која тој рече дека повеќе нема доверба, беше жестоко критикувана во Израел, каде протестите против владата се зголемуваат и против она што противниците на премиерот го гледаат како диктаторско однесување.
