Нетанјаху назначи шеф за национална безбедност и покрај одлуката на Врховниот суд Израелскиот премиер Бенјамин Нетанјаху го избра поранешниот командант на морнарицата Ели Шарвит за нов шеф на агенцијата за национална безбедност Шин Бет, соопшти денеска неговиот кабинет. Тој го избра новиот шеф на Шин Бет, иако Врховниот суд го замрзна барањето на владата за разрешување на актуелниот шеф Ронен Бар.
„По опсежните интервјуа со седум квалификувани кандидати, премиерот Бенјамин Нетанјаху одлучи да го назначи поранешниот командант на морнарицата, контраадмирал Ели Шарвит, за следен директор на Шин Бет“, се вели во соопштението на неговата канцеларија, според странските новински агенции.
Израелската влада на 21 март го разреши Бар од функцијата шеф на агенцијата Шин Бет, при што Нетанјаху го наведе недостатокот на доверба во шефот на безбедноста во време кога Израел е во војна. Според владината одлука, Бар треба да ја напушти функцијата кога ќе биде назначен неговиот наследник или најдоцна до 10 април.
Според медиумите, ова е првпат во израелската историја владата да го разреши шефот на Шин Бет. Опозициските партии и невладините организации поднесоа жалба на разрешувањето на Бар, тврдејќи дека одлуката на владата се заснова на конфликт на интереси. Израелскиот Врховен суд ја одложи владината одлука за ова до сослушување, кое ќе се одржи најдоцна до 8 април.
Бара, чиј мандат ќе истече следната година, беше назначен за шеф на Шин Бет во октомври 2021 година од претходната израелска влада, која накратко го собори Нетанјаху од власт меѓу јуни 2021 и декември 2022 година.
