Нетанјаху е одлучен да ги заштити сириските Друзи

Израел нападна цел во близина на претседателската палата во сирискиот главен град Дамаск, објави израелскиот премиер Бенјамин Нетанјаху. Тој вети дека ќе ги заштити членовите на заедницата Друзи во Сирија.

По втор пат, Израел ја напаѓа Сирија во рок од неколку дена. Нападите ја одразуваат длабоката недоверба на Израел кон сунитските исламисти кои го соборија сирискиот претседател Башар Асад во декември. Овие напади се уште еден предизвик за напорите на привремениот претседател на Сирија, Ахмед ал-Шара, да воспостави контрола врз проблематичната земја.

-Израел изврши напад синоќа во близина на претседателската палата во Дамаск – рече Нетанјаху во заедничка изјава со министерот за одбрана Израел Кац.

- Advertisement -

„Ова е јасна порака до сирискиот режим: Нема да дозволиме (сириските) сили да се распоредат јужно од Дамаск или да претставуваат каква било закана за заедницата Друзи“, се вели во текстот.

Непосредно пред ова, САД ги осудија нападите врз Друзите во Сирија.

-Неодамнешното насилство и поттикнување на насилство насочено кон членовите на заедницата Друзи во Сирија се за осуда и неприфатливи. Привремените власти мора да ги запрат борбите, да ги повикаат на одговорност сторителите на насилството и да ја обезбедат безбедноста на сите Сиријци – изјави Тами Брус, портпаролка на Стејт департментот.

Над 100 луѓе загинаа претходно оваа недела за време на меѓусекташките судири во Сирија. Највлијателниот друзски верски водач во Сирија го критикуваше привремениот претседател за водење геноцидна кампања против заедницата друзи.

Судирите меѓу Друзите и Сунитите во градот Џарамана, претежно населен со Друзи, избувнаа во вторникот поради аудио-снимка во која се навредува пророкот Мухамед, за која сунитите се сомневаат дека ја направил Друз. Насилството потоа се прошири во соседниот град Сана, на периферијата на Дамаск.