Израелскиот премиер Бенјамин Нетанјаху изјави дека разговарал со Жулиен Лерисон, регионален раководител на Меѓународниот Црвен крст и побарал негово вклучување во доставувањето храна и медицинска помош на израелските заложници во Газа.
– Лагата на Хамас за гладување одекнува низ целиот свет, додека нашите заложници трпат вистинско, систематско гладување, како и брутално физичко и психолошко малтретирање – му рекол Нетанјаху на претставник на Црвениот крст.
Израелскиот премиер алармирал дека светот не може да стои настрана пред шокантните сцени што „нè потсетуваат на нацистичките злосторства“.
Според израелските власти, во Газа сè уште има 50 заложници, а се верува дека само 20 се живи.
Во саботата, Хамас го објави своето второ видео со израелскиот заложник Евјатар Давид.
На видеото кое е мошне вознемирувачко, Давид, кој е слаб како скелет, копа дупка за која, како што вели во видеото, верува дека е негов сопствен гроб.
