Нестле ќе отпушти 16.000 работни места

Швајцарскиот прехранбен гигант Нестле во четврток објави дека ќе отпушти околу 16.000 работни места во следните две години за да ги намали трошоците.

Компанијата ќе отпушти околу 12.000 административни работни места во сите оддели и региони во кои работи и уште 4.000 по спроведувањето мерки за зголемување на продуктивноста во производството и синџирите на снабдување.

Нестле мора да се „промени побрзо“ за да се прилагоди на променливите глобални услови, рече извршниот директор Филип Навратил, додавајќи дека отпуштањата се „тешка, но неопходна одлука“.

- Advertisement -

Како дел од новиот план, менаџментот на Нестле има намера да ги намали трошоците за три милијарди швајцарски франци (3,23 милијарди евра) до 2027 година. Досега планираа да ги намалат за 2,5 милијарди франци.

Најголемата светска компанија за храна ги објави намалувањата на работните места во прелиминарниот деловен извештај за првите девет месеци од оваа година.Во периодот од јануари до септември, приходите на Нестле изнесуваа 65,9 милијарди франци (70,8 милијарди евра), што е намалување од 1,9 проценти во однос на истиот период минатата година.

Кога се исклучуваат валутните флуктуации и еднократните ставки, тие се зголемија за 3,3 проценти.

Неповолните валутни курсеви го намалија резултатот за 5,4 проценти.

Продажбата во првите девет месеци се зголеми за 0,6 проценти, а цените се зголемија за 2,8 проценти, покажа деловниот извештај.

Резултатите на европскиот пазар покажуваат 3,7 проценти повисоки цени отколку во првите девет месеци од минатата година и зголемување на продажбата од 0,5 проценти.

За целата 2025 година, раководството на Нестле очекува „малку посилен органски раст“ од минатата година, без да прецизира бројки. Резултатите од минатата година покажаа органска стапка на раст од 2,2 проценти, што е најниска за најмалку 25 години.