Најтрофејниот тенисер во историјата, Новак Ѓоковиќ, го освои четвртото место на егзибицискиот турнир „Шест кралеви“, кој се одржува во саудиската престолнина Ријад.
Во денешниот дуел во „АНБ Арена“, Ѓоковиќ се соочи со Американецот Тејлор Фриц, моментално четвртиот играч во светот. Иако српскиот ас одигра многу добра игра и беше расположен на теренот, тој одлучи да го предаде мечот по првиот сет, најверојатно поради физички ограничувања.
Фриц го доби првиот сет со резултат од 7:6 (4), по 76 минути одлична борба, во која публиката имаше можност да гледа многу изедначен дуел.
За време на средбата, двајцата тенисери покажаа високо ниво на игра, но и необичен број пропуштени шанси. Вкупно, пропуштија 14 можности за брејк – Ѓоковиќ 5, а Фриц дури 9. Десеттиот и единаесеттиот гем беа особено исцрпувачки, во кои Ѓоковиќ имаше четири сет-топки, но не успеа да ги искористи. Американецот го издржа притисокот, а потоа го реши сетот во тај-брејк, што на крајот се покажа како крај на натпреварот.
Американецот го доби тај-брејкот со 7:4 и така го зеде првиот сет, по што Ѓоковиќ се приближи до мрежата, му рече нешто кратко на противникот и веднаш отиде кај главниот судија – тој му ја подаде раката и сигнализираше предавање на натпреварот.
Едноставно – неговото тело не можеше повеќе да издржи и беше принуден да го предаде натпреварот.
Пред оваа средба, Ѓоковиќ беше поразен од италијанскиот тенисер Јаник Синер во полуфиналето на турнирот со резултат 2:0, што го остави без пласман во финалето.
Шпанецот Карлос Алкараз и Италијанецот Јаник Синер ќе се сретнат во големото финале на егзибицискиот турнир „Шест кралеви“.
Победникот на турнирот има право на импресивна парична награда од шест милиони долари – секој од учесниците веќе заработил 1,5 милиони, додека трофејот ќе донесе дополнителни 4,5 милиони долари.
