Најмалку 76 лица ги загубија животите во пожарот што вчера рано наутро избувна во хотел во ски-центарот Карталкаја, во северна Турција

Најмалку 76 лица ги загубија животите во пожарот што вчера рано наутро избувна во хотел во ски-центарот Карталкаја, во северна Турција, јавија турските медиуми.

Турскиот министер за внатрешни работи Али Јерликаја потврди дека бројот на загинати во пожарот се искачи на 76.

Претходно беше соопштено дека во пожарот е повредено 51 лице, од кои еден е во критична состојба. Седумнаесет од нив по укажаната лекарска помош биле пуштени од болница.

- Advertisement -

Јерликаја додаде дека во рамките на истрагата за пожарот во хотелот досега се уапсени девет лица.

Пожарот избувна во ски-центарот Карталкаја, кој се наоѓа на приближно 295 километри источно од Истанбул.

На местото на несреќата беа испратени бројни служби за итни случаи од соседните градови, вклучително и пожарникари, тимови за одговор при катастрофи и медицински тимови, поддржани од хеликоптери. Од хотелот се евакуирани околу 230 луѓе, а истрагата за причините за пожарот е во тек.

Карталкаја, која се наоѓа во провинцијата Бол, е една од најважните зимски туристички дестинации во Турција, привлекувајќи илјадници посетители за време на скијачката сезона.

Во Турција е прогласен национален ден на жалост, потврди претседателот Реџеп Тајип Ердоган.