Милијардерот и креатор на пропаднатите криптовалути TerraUSD и Luna, До Квон, кој се криеше во Србија и во Црна Гора, признал вина за две точки од обвинението за заговор за измама и измама преку интернет во САД, јави Си-Ен-Би-Си.
На сослушувањето во Њујорк, пред федералниот судија Пол Енгелмаер, тој признал дека давал лажни и погрешни информации за стабилноста на валутата.
Квон беше уапсен на крајот на минатата година во Црна Гора, додека се обидувал да отпатува за Дубаи со лажни пасоши. Претходно, некое време се криел во Србија, потврди Си-Ен-Ен повикувајќи се на обвинителите во Сеул во Јужна Кореја.
– Давав лажни и погрешни изјави за тоа како валутата ја вратила својата вредност, без да ја откријам улогата на фирмата за тргување во тој процес. Она што го направив беше погрешно – рече јужнокореецот на суд.
Обвинителката Кимберли Равенер изјави дека обвинителството нема да се спротивстави на можноста тој да биде префрлен во друга земја откако ќе ја одслужи половината од казната во САД. Според договорот, ќе биде препорачана казна не поголема од 12 години, иако законот предвидува максимум 25 години затвор.
Колапсот на криптовалутите TerraUSD и Luna во 2022 година предизвика загуби од околу 40 милијарди долари и пропаст на повеќе компании. Обвинителите тврдат дека Квон лажно уверувал инвеститори дека вредноста на TerraUSD е стабилизирана со алгоритам, додека тајно се вршеле масовни купувања за да се подигне цената на валутата.
Во 2024 година, Квон прифатил да плати 80 милиони долари казна и да се повлече од сите крипто-трансакции, како дел од спогодба вредна 4,55 милијарди долари со американската Комисија за хартии од вредност.
