Одделот на шерифот на округот Лос Анџелес соопшти дека истражува нови обвинувања за сексуални злоупотреби против раперот и продуцент Шон „Диди“ Комбс. Истражувањето е почнало откако полицијата во Флорида, каде што живее наводната жртва, доставила извештај.
Портпаролот на полицијата во градот Ларго, Флорида, изјави за „Еј-би-си Њуз“ дека таа управа ѝ помогнала на шерифската служба во Лос Анџелес, но дека не спроведува независна истрага.
Извештајот на полицијата во Ларго наведува дека мажот, кој тврди дека бил сексуално злоупотребен од Комбс во 2020 година, поднел пријава во септември.
Името на жртвата е покриено во извештајот, но музичкиот продуцент Џонатан Хеј на социјалните мрежи објави дека тој е подносител на пријавата. Хеј исто така е еден од тужителите во граѓанската тужба против Комбс поднесена во јули.
Хеј ѝ доставил на полицијата во Ларго фотографии и видеоматеријал кои, според него, ја докажуваат неговата соработка со Си Џеј Волес на музички проект, која довела до средби со Диди и до наводните инциденти.
Волес минатата недела поднел контратужба во Флорида, негирајќи ги „крајно лажните обвинувања“ на Хеј и нарекувајќи ги дел од „планирана кампања за дискредитирање“ со цел да се наруши неговиот приватен и професионален углед.
– Комбс категорички ги отфрла сите тврдења дека сексуално злоупотребил било кого. Со нетрпение очекуваме правдата да се задоволи на суд, каде ваквите случаи се решаваат врз основа на материјални докази, а не врз основа на медиумски шпекулации и неосновани тврдења – истакна неговиот адвокат Џонатан Дејвис.
Комбс, во јули, беше прогласен за виновен за два случаи на организирање проституција и моментално ја издржува казната од 50 месеци затвор, изречена во октомври.
