Кремљ ја чека „важната изјава“ за Русија што ја најави американскиот претседател Доналд Трамп, бидејќи тоа е единствениот начин да дознаеме за што станува збор, изјави портпаролот на Кремљ, Дмитриј Песков.
– Ја чекаме изјавата, за да разбереме што мислел претседателот Трамп … Внимателно ги бележиме сите нијанси во коментарите на шефот на американската држава – наведе Песков.
Трамп вчера за Ен-би-си њуз (NBC News) посочи дека в понеделник, 14 јули, ќе даде „важна изјава“ за Русија.
Денеска, 11 јули, рускиот шеф на дипломатијата по средба со американскиот колега Марко Рубио во Малезија на новинарите им рече дека бил повторен ставот за Украина кој рускиот претседател му го пренел на Трамп во телефонски разговор од 3 јули.
Лавров ја спомна „важната изјава“ која ја најави Трамп одговарајќи на прашање дали на Рубио му изнел нов руски предлог за мир.
– Ќе одговорам со зборовите на Доналд Трамп: „Па, почекајте додека не ви кажам“… Можете да очекувате големи изненадувања. Нема да коментираме сега – рече рускиот министер.
Рубио по средбата изјави дека разговарал со Лавров за поинаков прристап во мировните преговори за Украина, нагласувајќи дека ќе му го презентира концептот на Трамп, но дека не верува оти тој концепт гарантира мир.
Додека реториката на Трамп за Русија се заостри во последните денови, сенаторите Линдзи Греам и Ричард Блументал во САД предложија закон со кој земјите кои увезуваат руски енергенси ќе бидат царинети со 500%. Тие го нарекоа предлогот „пресврт во економскиот притисок врз Москва“.
Украинскиот претседаел Володимир Зеленски, по средба со Греам и Блументал, изјави дека разговарал со нив за подобрување на воздушната одбрана на Украина.
