Кинескиот претседател Си Џинпинг за првпат јавно проговори за ескалацијата на трговската војна со САД, велејќи дека Кина „не се плаши“ и нема да попушти пред „неправедната репресија“. Неговите зборови доаѓаат во време кога меѓународните пазари се под притисок и расте стравот од глобална рецесија.
„Нема победници во трговската војна, а спротивставувањето на целиот свет води само до изолација“, рече Кси за време на состанокот со шпанскиот премиер Педро Санчез во Пекинг, според кинеската државна телевизија CCTV.
Кси истакна дека економскиот развој на Кина повеќе од седум децении се заснова на „самодоверба и напорна работа“, а не на странска помош. Тој додаде дека Кина, без оглед на надворешните притисоци, останува решена да се фокусира на сопствениот развој.
„Без разлика како се менува надворешното опкружување, Кина ќе остане самостојна, концентрирана и фокусирана на добро управување со сопствените работи“, рече тој.
Кси ја искористи средбата со Санчез за да испрати јасна политичка порака до Европската унија. Кинескиот претседател го повика Брисел да се спротивстави на, како што го нарече, „еднострано малтретирање“ со Пекинг, очигледно упатување на високите царини што американскиот претседател Доналд Трамп ги воведе на кинески стоки.
„Претседателот Си Џинпинг ја повика Европската унија да застане со Кина во отпорот на едностраното малтретирање“, објавија утринава кинеските државни медиуми.
Администрацијата на Трамп неодамна ги зголеми царините за кинеските производи на 145 отсто, што предизвика силни реакции во Пекинг и дополнително комплицирајќи ги глобалните трговски текови. Кинеските власти претходно најавија „борба до крај“, а Кси сега за прв пат лично го изрази ставот на Пекинг.
Трамп завчера објави дека за 90 дена ги замрзнува новите царини за сите трговски партнери освен Кина. Европската унија одговори со паузирање на сопствените најавени контрамерки и на 90 дена, отворајќи ја можноста за намалување на ескалацијата меѓу Брисел и Вашингтон, но во исто време потенцирајќи ја се поинтензивната трговска војна меѓу САД и Кина.
