Кремљ го поздрави потегот на владата на американскиот претседател Доналд Трамп да ја ревидира својата стратегија за национална безбедност и да престане да ја нарекува Русија „директна закана“, изјави портпаролот Дмитриј Песков, објави денес ТАСС. „Го сметаме тоа за позитивен чекор“, рече Песков.
Пораките за руско-американските односи што ги испрати администрацијата на претседателот Доналд Трамп се разликуваат од пристапот на претходните администрации, изјави портпаролот на Кремљ.
Кремљ подетално ќе ја разгледа ажурираната стратегија за национална безбедност на САД за да ги анализира нејзините одредби, рече Песков.
„Секако треба да се разгледа и анализира подетално“, рече тој.
Ова беше неговиот коментар за изменетиот клучен документ за национална безбедност на САД, во кој Русија не се споменува како „директна закана“ и кој содржи покана за соработка со Москва во областа на стратешката стабилност, објави ТАСС.
Американските стратегии по руската анексија на Крим во 2014 година и инвазијата на Украина во 2022 година ја означија Москва како главна закана, но ажурираниот документ, објавен во петок, има помек тон и ја охрабрува соработката со Русија, иако ограничена.
Новата стратегија од 29 страници ја изложи визијата на Трамп за надворешна политика како визија на „флексибилен реализам“ и наведе дека американската политика првенствено ќе биде водена од „она што функционира за Америка“.
