Преговорите меѓу руската и американската делегација во главниот град на Саудиска Арабија „можат да го отворат патот“ за средба на двајцата претседатели веќе следната недела, соопшти денеска агенцијата Блумберг без да наведува извори.
Јуриј Ушаков, помошник на претседателот на Руската Федерација, кој присуствуваше на преговорите, изјави дека делегациите ќе разгледаат, меѓу другото, и можност за средба меѓу двајцата претседатели.
– Најважно е да започнеме вистинска нормализација на односите меѓу нас и Вашингтон – истакна тој.
Украинскиот претседател Володимир Зеленски денеска од Анкара изјави дека не планира да отпатува во Саудиска Арабија и го осуди фактот што не беше поканет, велејќи дека „му е баш гајле за руско-американските преговори“.
Фокс Њуз пишува дека руско-американскиот план за крај на војната вклучува и избори во Украина бидејќи на рускиот претседател Владимир Путин му треба „марионетски претседател“ во преговорите, додека Трамп би прифатил каков било исход од ваквите избори.
Што по средбата на делегациите во Саудиска Арабија? Додека руски и американски претставници во вторникот разговараа во Ријад, во понеделникот попладне францускиот претседател Емануел Макрон ги собра европските лидери во Париз. На средбата присуствуваа лидерите на неколку земји, а се зборуваше за здружениот одговор на ЕУ во врска со ситуацијата со Украина.
Неименувани извори за Ројтерс изјавија дека во Париз во среда е планиран нов состанок на европските лидери на кој ќе присуствува и Канада. Овојпат ќе бидат повикани европските земји кои не беа присутни на претходниот состанок. Поканети се Норвешка, Канада, Чешка, Грција, Финска, Романија, Шведска, Белгија, како и три балтички земји Литванија, Естонија и Летонија.
Полскиот претседател Анджеј Дуда денеска изјави дека добил „гаранции“ од САД дека не размислуваат за намалување на присуството на нивните сили во регионот, по состанокот со американскиот специјален пратеник за Украина, Кит Келог.
Полска, сојузник и сосед на Украина, беше последната станица на патувањето на Келог во Киев, каде што треба да пристигне утре.
