Кина го повика јапонскиот амбасадор на разговори поради коментарите на премиерот Такаичи дека кинескиот напад врз Тајван би можел да ја загрози Јапонија. Пекинг ги нарече коментарите провокативни.
Кина го повика јапонскиот амбасадор на разговори поради коментарите на новиот јапонски премиер Санае Такаичи за Тајван, соопшти денес Министерството за надворешни работи во Пекинг.
Такаичи минатата недела пред парламентарниот комитет изјави дека кинескиот напад врз Тајван би можел да претставува „закана за опстанокот на Јапонија“ и би можел да доведе до тоа Токио да го искористи своето право на самоодбрана, објави јапонската новинска агенција Кјодо, повикувајќи се на германската ДПА.
Министерството за надворешни работи на Кина денес соопшти дека нејзините коментари се отворено провокативни и исклучително опасни. „Тајван е дел од Кина, а прашањето за Тајван е неповредлива црвена линија“, нагласи.
Властите во Пекинг го повикаа јапонскиот амбасадор на разговори поради изјавите на премиерката и побараа Такаичи да ги повлече своите изјави, што предизвика многу негативни реакции и остри критики во Кина, вклучително и во дипломатските кругови.
Тајван
Тајван, остров со население од приближно 23 милиони, беше јапонска колонија од 1895 до 1945 година, а од крајот на граѓанската војна во 1949 година функционираше независно од кинеското копно како самоуправен остров со демократски систем. Кина, во меѓувреме, го смета Тајван за дел од својата територија и, како дел од политиката „една Кина“, која ја почитуваат повеќето земји низ целиот свет, постојано најавува преземање на контролата врз него – со сила доколку е потребно.
Во светлината на ова, Пекинг долго време го зголемува воениот притисок врз островот и редовно спроведува воени вежби во негова близина. Тајпеј, пак, ја зајакнува својата одбрана, вклучително и преку поблиски врски со САД и нивните сојузници во регионот.
Министерството за надворешни работи на Тајван во вторникот соопшти дека САД одобриле продажба на воена опрема во вредност од 330 милиони долари на Тајван, прв таков договор откако претседателот Доналд Трамп се врати во Белата куќа во јануари.
