Европските земји не се сите подеднакво изложени на американскиот пазар и затоа нема да претрпат исти последици ако претседателот Доналд Трамп ги оствари своите закани и воведе царини од 30 проценти на Европската унија (ЕУ), пишува АФП во недела.
Ирска, со својата важна фармацевтска индустрија, е на првата линија заедно со Германија, за која САД се главен пазар за автомобили, челик и машински алати.
Франција е помалку изложена, иако има воздухопловни и прехранбени компании, како и производители на вино и луксузни стоки кои ризикуваат да изгубат пазари.
ЕУ како целина има годишен трговски суфицит со САД од 235,6 милијарди американски долари, според Бирото за економски анализи на САД (BEA), кое известува за Министерството за трговија.
Само во случајот со Кина овој суфицит е поголем.
Ирска има најголем суфицит од која било земја-членка на ЕУ, од 86,7 милијарди долари, главно поради присуството на големите американски фармацевтски компании како што се „Фајзер“, „Ели Лили“ и „Џонсон и Џонсон“. Сите тие се лоцирале во Ирска за да ја искористат стапката на корпоративен данок од 15 проценти, во споредба со 21 процент во САД.
Овие компании ги поднесуваат своите патенти во Ирска и продаваат на американскиот пазар, каде што цените на лековите традиционално се повисоки отколку во остатокот од светот.
Ирска е исто така дом на европското седиште на американските технолошки гиганти како што се „Епл“, „Гугл“ и „Мета“, кои исто така се привлечени од ирскиот даночен систем.
Севкупно, фармацевтските производи сочинуваат 22,5 проценти од извозот на ЕУ во САД, според Евростат, при што главните играчи најавуваат големи инвестиции во САД.
Германија, најголемата економија во Европската Унија, е особено под притисок поради нејзината зависност од извозот – земјата има трговски суфицит со САД од 84,8 милијарди долари, главно благодарение на нејзината автомобилска, хемиска, челична и машинска индустрија.
САД учествуваат со 23 проценти во приходите на Мерцедес Бенц. Иако дел од приходите доаѓаат од теренски возила произведени во САД за извоз, постои ризик овој сегмент да биде силно погоден ако ЕУ одлучи да возврати во царинска војна.
Федерацијата на германски индустрии (BDI) брзо реагираше на објавата на Трамп во саботата, повикувајќи ги ЕУ и САД „брзо да најдат решенија и да избегнат ескалација“.
ИТАЛИЈА И ФРАНЦИЈА НА ВТОР РЕД
Италија, со трговски суфицит со САД од 44 милијарди долари и Франција со 16,4 милијарди долари, според американската статистика (француските податоци покажуваат дека суфицитот е многу помал), би биле помалку погодени, но некои сектори се многу изложени.
Во обете земји, прехранбената и винската индустрија би биле силно погодени, а Шпанија не е исклучок.
Царина од 30 проценти би била „катастрофа“ за француските вина и жестоки пијалоци, рече Жером Деспи, раководител на винскиот сојуз FNSEA.
„Колдирети“, главното земјоделско здружение на Италија, во саботата изјави дека царина од 30 проценти би ги чинело американските потрошувачи и италијанските производители на храна околу 2,3 милијарди долари.
Како и Германија, Италија е исто така загрижена за својата автомобилска индустрија. Француско-италијанскиот производител на автомобили „Стелантис“ (особено „Фиат“ и „Пежо“) ги одложи своите прогнози и проекции за оваа година поради неизвесноста околу царините.
Секторите за воздухопловство и луксузна стока во Франција се исто така многу изложени. „ЛВМХ“, најголемиот светски конгломерат за луксузна стока, генерира една четвртина од својата продажба во Соединетите Американски Држави.
Околу една петтина од францускиот извоз во Соединетите Американски Држави е во воздухопловната индустрија, поголемиот дел од него е „Ербас“.
Австрија и Шведска, исто така, имаат трговски суфицит со САД од 13,1 милијарда долари и 9,8 милијарди долари, соодветно.
