Израелската армија започна копнена офанзива за окупирање на градот Газа

Израелската армија започна копнена офанзива за окупирање на градот Газа. Ова го објави американската веб-страница „Аксиос“, која наведува дека владата на израелскиот премиер Бенјамин Нетанјаху тврди дека операцијата има за цел искоренување на Хамас.

Се наведува дека копнената операција што започна вечерва претставува нова ескалација во војната што трае речиси две години и се очекува да го зголеми бројот на жртви и да ја влоши хуманитарната катастрофа во палестинската енклава.

Повеќе од 350.000 Палестинци досега се евакуирани од градот Газа во други делови од Појасот, објави израелската војска (ИДФ).

- Advertisement -

Се проценува дека илјадници луѓе го напуштиле градот преку ноќ поради силниот бран воздушни напади, изјави извор од одбраната, според „Тајмс оф Израел“. Изворот, исто така, рече дека бројот на палестински цивили што го напуштаат градот Газа веројатно ќе се зголеми како што напредува офанзивата.

Се проценува дека околу еден милион Палестинци живееле во градот Газа пред Израелските одбранбени сили да почнат да се подготвуваат за офанзивата.

Израелскиот министер за одбрана, Израел Кац, изјави дека израелската армија дејствува „со железна тупаница“ против „терористичката инфраструктура“ во Појасот Газа.

– Газа гори – изјави Кац.

Според него, војниците се борат „за да создадат услови за ослободување на заложниците и пораз на Хамас“.

Oд друга страна, Израел вчера го погоди седиштето на Хезболах во јужниот либански град Набатија, соопшти израелската армија.

Според либанското Министерство за здравство, најмалку осум лица се ранети во нападот, вклучувајќи четири деца и три жени.

Големата копнена офанзива на Израел во градот Газа и нападот во Јужен Либан доаѓаат само денови откако Израел ненадејно го нападна градот Доха во Катар, потег кој ја изненади меѓународната јавност и ги разниша надежите за дипломатско решение на конфликтот.