Израел: Ќе изградиме 22 еврејски населби во окупираниот Западен Брег

Израелскиот министер за финансии, Безалел Смотрих, во четврток наутро објави изградба на 22 еврејски населби во окупираниот Западен Брег, што би можело дополнително да ги комплицира веќе напнатите односи на Израел со голем дел од меѓународната заедница.

„Донесовме историска одлука за развој на населбите: 22 нови населби во областа Јудеја и Самарија“, рече Смотрих, министер од крајната десница, користејќи го името што Израелците го користат за Западниот Брег, палестинска територија што е под израелска окупација од 1967 година.

Според мапата објавена од партијата Ликуд, десничарската партија на израелскиот премиер Бенјамин Нетанјаху, 22-те планирани населби ќе бидат расфрлани низ Западниот Брег, од север кон југ, преку центарот.

- Advertisement -

ОН редовно ја осудува израелската населбена активност како нелегална според меѓународното право и една од главните пречки за трајно мирно решение меѓу Израелците и Палестинците, бидејќи го спречува создавањето на одржлива палестинска држава.

Соопштението на Смотрич доаѓа откако Стив Виткоф, специјалниот претставник на американскиот претседател Доналд Трамп за Блискиот Исток, во средата изјави дека има „многу добро чувство“ за можноста за прекин на огнот во Газа по 600 дена војна меѓу Израел и Хамас.

Ова исто така доаѓа во време кога Франција треба да биде копретседател на конференцијата на ОН со Саудиска Арабија во јуни, чија цел е промовирање на мировно решение за „две држави“: Израел и независна и целосно суверена Палестина, со нејзините луѓе кои живеат еден до друг во хармонија.