Итен апел од МНР за воздржаност од патувања, 3 амбасади во готовност

Во светло на драматично влошената безбедносна состојба на Блискиот Исток, Министерството за надворешни работи и надворешна трговија денеска апелираше до сите македонски државјани кои се наоѓаат во земјите од регионот да бидат крајно внимателни и да постапуваат исклучиво по насоките на локалните власти.

– Ги повикуваме сите наши граѓани кои се наоѓаат во земјите од регионот – особено во Катар, Израел и Обединетите Арапски Емирати – редовно да ги следат официјалните национални портали за итни состојби и да се информираат за евентуални мерки и евакуации – апелираат од МНР.

Воедно, од министерството додаваат дека патувањата во овој дел од светот треба да се одложат.

- Advertisement -

– Уште еднаш упатуваме јасен апел до сите македонски граѓани да се воздржат од патувања во земјите на Блискиот Исток сè додека не се стабилизира безбедносната состојба – велат од МНР.

Министерството потсетува и дека македонските амбасади во Тел Авив, Доха и Абу Даби се подготвени да им пружат поддршка на сите граѓани кои имаат потреба од информации, логистика или асистенција.

– Дипломатско-конзуларните претставништва се во постојана комуникација со граѓаните. Безбедноста на македонските државјани ни е апсолутен приоритет – велат од МНР.

За итни случаи, граѓаните можат да ги искористат следните контакти:

– Амбасада во Тел Авив: +972 54 500 8566 / +972 54 967 0546 – telaviv@mfa.gov.mk

– Амбасада во Абу Даби: +971 56 441 7532 – abudabi@mfa.gov.mk

– Амбасада во Доха: +974 50 173 111 – doha@mfa.gov.mk

– МНР дежурни броеви: +389 75 273 732 / +389 75 268 736 – globalsos@mfa.gov.mk