Исплатени се субвенции за градинарски производи и млеко

Денеска се исплатени повеќе од 407 милиони денари (6,6 милиони евра) на околу 8 000 земјоделци, информира на прес конференција министерот за земјоделство Цветан Трипуновски

Префрлени се повеќе од 259 милиони денари на 4.143 производители за градинарски култури предадени во преработувачки капацитети. Поддршката е 3 денари за килограм за сите градинарски култури, освен за пиперката „куртовска капија“ за која директните плаќања се 5 денари за килограм. Се работи за производствоп предадено во периодот од мај до јуни, односно од ноември до декемви 2024 година.

-Оваа мерка е клучна за поддршка на нашите градинари кои се посветени на квалитетно производство наменето за преработка – рече Трипуновски.

- Advertisement -

Тој информира дека денеска се исплатени и повеќе од 147 милиони денари на 3.686 земјоделци за произведено и предадено кравјо, козјо и овчо млеко.

Поддршката е 6 денари за литар кравјо и 7 денари за литар овчо и козјо млеко. Исплатите се однесуваат за периодот јануари, февруари и март 2025 година.

– Од почеткот на мојот мандат во Министерството се исплатени повече од 11 милијарди денари што е доволен доказ за нашата посветеност кон земјоделството. Нашата заложба за зголемена конкурентност на домашното производство продолжува. Покажавме дека ги градиме темелите на промените и дека го вреднуваме трудот на земјоделците – рече Трипуновски.

Тој смета дека поддршката има ефект кога се исплаќа навреме.

-Минатата една година со оваа континуирана исплата, според статистиката, порасна домашното производство, но и извозот. Еден од примерите е пченицата. Жетвата заврши и согласно нашата евиденција, ожнеани се над 280.000 тони што е враќање на нормалното ниво, колку што се домашните потреби. Ова е доказ дека земјоделците гледаат партнер во Владата – рече Трипуновски.