Косовскиот демократски институт денес оцени дека неуспехот да се конституира Собранието повеќе не е само постизборна политичка криза, туку сериозно институционално нарушување со директни последици за функционалната демократија и почитувањето на Уставот на Косово.
Во анализата на последиците од блокадата во косовското собрание, институтот наведува дека неуспехот да се конституира Собранието создава институционален вакуум, во кој граѓаните остануваат без политичка застапеност, додека Владата во оставка дејствува без парламентарен надзор, а независните институции остануваат надвор од демократска контрола.
„Собранието не е само законодавна институција. Тоа е основа на уставниот поредок на Косово. Без функционално Собрание, граѓаните се исклучени од донесувањето одлуки, а државата влезе во фаза на пауза“, се оценува во анализата.
Според анализата, неуспехот да се конституира Собранието влијае на повеќе нивоа од функционирањето на Косово.
Во овој период на вакуум, владата во заминување донесе одлуки со големо политичко и финансиско влијание – вклучувајќи повеќе од 70 милиони евра буџетски обврски – без парламентарна контрола и надвор од ограничениот мандат утврден со Законот за влада.
Одлуките за доделување субвенции, формирање постојани комисии или кадровски промени во јавните комисии беа донесени без никаков надзорен филтер или институционална дебата.
Во меѓувреме, клучните најавени и договорени реформи останаа заглавени, а пет предлог-закони во областа на судските реформи беа блокирани.
Процесот на ратификација на меѓународните договори е целосно запрен – вклучително и оние поврзани со Меѓународниот монетарен фонд, Светската банка и Планот за раст на Европската унија, кој треба да му донесе на Косово повеќе од 800 милиони евра, проценува анализата, додавајќи дека без функционално Собрание, сите овие партнерства се во опасност од неуспех.
Ситуацијата не е ограничена само на законодавната сфера.
Според институтот, повеќе од 20 независни институции, со годишен буџет од 59 милиони евра, останаа без надзор, што отвора простор за политичка интервенција, недостаток на транспарентност и злоупотреба на јавни средства.
„Оваа ситуација ја поткопува институционалната легитимност и неповратно ја оштетува довербата на јавноста во демократскиот систем“, се вели во анализата.
