Изјавите на американскиот претседател Доналд Трамп со закана дека „целиот пекол ќе се ослободи“ доколку израелските заложници не бидат ослободени до сабота „немаат вредност и само ги комплицираат работите“, изјави лидер на Хамас за АФП.
„Трамп треба да се потсети дека постои договор за прекин на огнот што двете страни (Израел и Хамас) треба да го почитуваат и дека тоа е единствениот начин да се вратат затворениците“, изјави Сами Абу Зухри, еден од лидерите на палестинското исламистичко движење.
„Заканувачкиот јазик е безвреден и само ги комплицира работите“, додаде тој.
Американскиот претседател Трамп синоќа изјави дека доколку сите заложници во Газа не бидат ослободени до сабота напладне, ќе предложи да се прекрши примирјето меѓу Израел и Хамас, што, како што предупреди, „ќе го донесе целиот пекол“.
Во изјавите за новинарите додека потпишуваше серија извршни наредби и резолуции во Белата куќа, Трамп нагласи дека одлуката на крајот останува на Израел, но предупреди дека „целиот пекол ќе се ослободи“ доколку преостанатите заложници не бидат ослободени, додавајќи дека стравува дека многу од нив се мртви. Американскиот претседател рече и дека преостанатите заложници повеќе не треба да се ослободуваат поединечно, туку сите веднаш да бидат ослободени.
Договорот за прекин на огнот меѓу Израел и Хамас, преговаран преку Катар со помош на САД и Египет, стапи на сила на 19 јануари по повеќе од 15 месеци војна што го опустоши Појасот Газа.
Досега, според условите на прекинот на огнот, 16 израелски заложници земени на 7 октомври 2023 година, кога Хамас го нападна Израел, што ја предизвика војната, се ослободени во замена за околу 700 Палестинци затворени во Израел. Ослободени се и пет тајландски заложници.
Вкупно 33 израелски заложници треба да бидат ослободени за време на првата фаза од прекинот на огнот, кој завршува на 1-ви март. Но, Хамас вчера објави дека на неодредено време ќе ја одложи следната размена закажана за сабота, обвинувајќи го Израел за прекршување на примирјето.
Израел ја нарече одлуката на Хамас целосно кршење на договорот и нареди на својата војска да биде подготвена „за секое сценарио“.
Хамас потоа даде гаранција дека е „отворен“ за ослободување на израелските заложници во замена за Палестинците затворени во Израел да се изврши според планираното во сабота, откако Израел „ги исполни своите обврски“.
