Израелскиот премиер Бенјамин Нетанјаху изјави во четвртокот дека се надева оти во следните неколку дена ќе се постигне договор за ослободување на уште израелски заложници кои се држат во заробеништво од палестинската исламистичка група Хамас, објави Ројтерс.
Нетанјаху рече дека Хамас сè уште држи 50 заложници, од кои, според него, само 20 се верува дека се сè уште живи.
– Сакам да ги извадам сите. Сега имаме договор кој, наводно, ќе овозможи да се ослободат половина од живите и половина од мртвите – изјави Нетанјаху.
Хамас ќе ослободи 10 заложници
Хамас претходно соопшти дека ќе ослободи 10 заложници кои се држат во Газа, во обид да се постигне договор за прекин на огнот што би ставил крај на 21-месечната војна во палестинската енклава, додека Нетанјаху водеше високи преговори во Вашингтон, објави Ен-Би-Си њуз.
Како дел од својата „посветеност на успехот“ на тековните мировни разговори, милитантната група објави во соопштение во средата дека ќе ги ослободи заробените, но предупреди дека преговорите со Израел биле тешки. Не беше наведено кога точно ќе бидат ослободени заложниците.
Оваа објава доаѓа додека Нетанјаху изјави дека разговорите со претседателот Доналд Трамп на двете средби во Вашингтон биле фокусирани на ослободување на заложниците кои сè уште се наоѓаат во Газа.
Посетата на Нетанјаху се случува нешто повеќе од 2 недели откако Трамп нареди бомбардирање на ирански нуклеарни објекти во поддршка на израелските воздушни напади. Претседателот потоа помогна во договарање на прекин на огнот по 12 дена борби.
Нетанјаху, во објава на мрежата Икс, додаде дека со Трамп разговарале и за можните последици, а и можности, од војната со Иран, што тој ја опиша како „голема победа“.
„Блиску сме до договор“
Трамп изјави во средата дека постои „многу добра шанса“ да се постигне договор за прекин на огнот меѓу Израел и Хамас, наведувајќи дека примирјето би можело да стапи на сила уште оваа или наредната недела, но нагласи дека ништо не е загарантирано.
Државниот секретар Марко Рубио ги повтори тие ставови во четвртокот, изјавувајќи дека смета оти „сме поблиску отколку што сме биле подолго време“ до прекин на огнот и дека американскиот пратеник Стив Виткоф е оптимист дека наскоро ќе се одржат директни разговори.
Неговите коментари доаѓаат откако администрацијата на Трамп одлучи да воведе санкции против специјалниот известувач на Советот за човекови права на Обединетите нации, Франческа Албанезе, која е отворен критичар на израелската офанзива во Газа.
Рубио во објава на Икс рече дека Албанезе е санкционирана „поради нејзините нелегитимни и срамни обиди“ да поттикне постапки на Меѓународниот кривичен суд против „американски и израелски функционери, компании и директори“.
Албанезе не се осврна директно на санкциите, но напиша во објава на Икс: „Само за да биде јасно, токму денес повеќе од кога било: цврсто и убедено стојам на страната на правдата, како што отсекогаш сум стоела“.
