Група малолетници во Гевгелија крвнички нападнале штрк, заштитена и мирољубива птица, пред очите на згрозени граѓани

Група малолетници во Гевгелија крвнички нападнале штрк, заштитена и мирољубива птица, пред очите на згрозени граѓани. Според сведоци на настанот, децата со велосипеди го прегазиле животното и му го скршиле крилото.

Инцидентот предизвика силни реакции на социјалните мрежи. Граѓани, кои биле присутни на местото на настанот сведочат за насилничкото однесување на малолетниците.

– Еве овде се штрковите, по цел ден шетаат слободно и во 4 попладне си влегуваат сами во дворот. Не знам од каде и зошто таа агресија – со четири велосипеди крвнички да претепаш заштитена птица – велат жители на Гевгелија.

- Advertisement -

Птицата, која преживеала и покрај сериозните повреди, е прегледана од ветеринар и прима инјекции, според локални извори.

Организацијата за заштита на животните „Анима мунди“ остро реагираше на случајот и побара итна интервенција од институциите.

– Се работи за страшно малтретирање и повредување штрк од страна на деца. Според очевидци и видеоснимки од безбедносни камери, станува збор за свесен и суров чин на насилство врз младо, диво животно, што завршило со сериозни повреди. Овој настан не смее да помине незабележано, ниту неказнето – велат од „Анима мунди“.

Оттаму предупредуваат дека децата кои учествувале во чинот се жртви на општествена незаинтересираност, но и потенцијален ризик за себе и за околината доколку не се преземат сериозни чекори.