Откако претседателката Сиљановска-Давкова предложи задолжително планинарење во физичкото образование, граѓаните одговорија: „Има уште работа, госпоѓо претседателке!”
Предметот Физичко образование, според новата претседателска иницијатива, треба да вклучува планинарење. Инспирирана од државите каде што рекреативното планинарење е дел од филозофијата на здрав живот, Гордана Сиљановска-Давкова најави модернизација на наставната програма.
Но, граѓаните не останаа глуви на овој повик. Напротив! Со енергија достојна за масовно качување на Кајмакчалан, тие подготвија сопствен пакет на законски измени за проширување на програмата:
ПРЕДЛОГ-ИЗМЕНИ ОД ГРАЃАНСКОТО СОБРАНИЕ
1. ГЛЕДАЈ-НЕГЛЕДАЈ (Задолжителен предмет од предучилишна возраст) Теоретска и практична обука за селективна перцепција на реалноста. Учениците ќе вежбаат како да поминат покрај дупка на патот, скршена клупа во паркот, или некомпетентен функционер, а да не ги видат. Финалниот испит: 30-минутна прошетка низ градот без да се забележи ниту еден проблем.
2. СЛУШАЈ-НЕСЛУШАЈ (Две часа неделно, плус дополнителна настава за талентирани) Напредни техники на аудитивна селекција. Како да се слуша спикер од владата цел час, а да не се запамети ниту еден збор. Како да се присуствува на собрание и да се изгледа внимателено додека се размислува за викенд планови. Специјализирани модули: “Климање со глава додека не слушаш” и “Стратегиско поставување прашања за да се прикрие дека си заспал”.
3. МАСОВНО ТРЕНИРАЊЕ НА ГЛАД (Интензивна настава со реални услови) Практична подготовка за економски кризи. Curriculum (наставна програма): Како да се помине до први – од месецот, не од класот. Како да се направи ручек од три состојки што чинат 50 денари вкупно. Напредно ниво: Филозофска интерпретација на “гладен сум” во “на диета сум”.
4. ПРЕЖИВУВАЊЕ СО 24.000 ДЕНАРИ (Мајсторски курс за матуранти) Финансиска акробатика на олимписко ниво. Предметот вклучува: Стратегии за плаќање сметки по приоритет (струја или кирија?), Алхемија на домаќинството (од ништо нешто), Психологија на задолжувањето (кај кого уште не барав?), и докторска теза на тема “Благородството на сиромаштијата во 21 век”.
ДОПОЛНИТЕЛНИ ПРЕДЛОЗИ
5. ЧЕКАЊЕ ВО РЕД (Обука за трпеливост и покорност) Четири часа стоење во ред за било што – шалтер, автобуска станица, болница. Со тестови на издржливост: Колку долго можеш да чекаш пред да експлодираш?
6. ПАРКИРАЊЕ ВО СКОПЈЕ (Екстремен спорт) Да се најде паркинг место во центарот на градот е поголем предизвик од да се искачи на Еверест. Теренска настава во Дeбар Маало.
7. НАВИГАЦИЈА ПО БИРОКРАТИЈА (Лавиринт без излез) Како да се извади лична карта, пасош, или било кој документ со помалку од 15 посети на шалтери. Напредно ниво: Објаснување зошто ти треба потпис од 7 различни институции за еден парче хартија.
——————————————————————————————————————————————————————————————————
Претседателката со планинарењето отвори врата. Граѓаните влегоа со цел шлепер на предлози. Зашто, ако веќе ќе подготвуваме млади за животот, ајде да биде тоа вистинскиот живот – оној со редици, глад, бирократија и плата со која можеш или да платиш кирија или да јадеш.
Поука: Кога власта живее на планината, а народот во долината, е време народот да ја напише програмата. Затоа што почитуванапретседателко, ние сме докторирале на Универзитетот на Тешкиот Живот – и тоа без стипендија.
Планинарењето е убаво. Но прво ајде да научиме како да не паднеме во провалијата на секојдневието.
Сашо ДЕНЕСОВСКИ
