Гигантите од Милано добиваат нов дом до 2031 година

Италијанските медиуми денеска пренесоа дека претседателот на Милан, Паоло Скарони (78), најави голем проект кој целосно ќе го промени спортскиот лик на Милано. Тој рече дека до 2031 година градот ќе добие нов стадион кој ќе биде најдобар во цела Европа.

– Проектот за нов стадион во квартот Сан Сиро е во изработка веќе подолго време. Инвестирани се значајни средства и сигурен сум дека ќе ја постигнеме поставената цел. Милан и Интер ќе го добијат најдобриот стадион во Европа, со кој ќе бидат горди сите граѓани на Милано – изјави Скарони, познат бизнисмен кој претходно бил на чело на енергетските гиганти „Енел“ и „Ени“.

Проектот доби силен импулс оваа недела, откако надлежниот комитет на Градскиот совет на Милано даде зелено светло за купување на земјиштето на кое се наоѓа актуелниот стадион „Џузепе Меаца“. Двата клуба ќе платат 197 милиони евра за земјиштето и околната површина.

- Advertisement -

Крајната цена за изградба на новиот стадион е проценета на околу една милијарда евра. Сè уште не е јасно дали легендарниот „Џузепе Меаца“, со капацитет од 75.000 гледачи, ќе биде делумно адаптиран или целосно урнат. Последната голема реконструкција на стадионот беше направена во 1990 година, пред Светското првенство во Италија.