Ги повлекува ли Ким Јонг-Ун своите војници од Русија?

Северна Кореја ги повлече своите војници од фронтот во рускиот регион Курск поради големи загуби, јави денеска јужнокорејската новинска агенција Јонхап, повикувајќи се на јужнокорејската разузнавачка служба (НИС).

Од средината на јануари „нема знаци“ за севернокорејско воено присуство во борбите во Курск, пренесе Јонхап.

Претходно, украинските и американските медиуми, вклучително и Њујорк тајмс, известија за повлекувањето на севернокорејските војници, потсетува ДПА.

- Advertisement -

Во извештајот на НИС се наведува дека една од причините за повлекувањето веројатно се масовните загуби на војници од Пјонгјанг, но истрагата за целосната слика сè уште е во тек.

Според проценките на НИС, околу 300 севернокорејски војници загинале, а дополнителни 2.700 биле ранети во борбите околу Курск.

Северна Кореја ѝ испратила на Русија околу 12.000 војници за борби против Украина од крајот на минатата година. Од тогаш, НИС соработува интензивно со украинските разузнавачки служби.

Би-Би-Си во саботата напиша дека украинските специјални сили кои се борат во Курск изјавиле за медиумот дека не виделе севернокорејски војници таму во последните три недели.

Портпаролот на украинските специјални сили изјави дека Севернокорејците најверојатно се повлекле откако претрпеле големи загуби.