Германија се соочува со сериозно влошување на временските услови – обилни снежни врнежи, замрзнат дожд и силна бура веќе го зафатија дел од земјата

Топ Вести - Слушај сега

Германија се соочува со сериозно влошување на временските услови – обилни снежни врнежи, замрзнат дожд и силна бура веќе го зафатија дел од земјата, а најтешкиот удар допрва се очекува.

- Advertisement -

Германската метеоролошка служба (DWD) предупредува дека од четврток навечер голем дел од земјата ќе биде погоден од интензивни врнежи, при што во низините може да наврнат и до 20 сантиметри нов снег, а на одредени места ќе има и опасен замрзнат дожд.

– Станува збор за екстремни услови, особено поради комбинацијата од силен ветер и снег – предупредуваат од „DWD“.

Според метеоролозите, лошото време е предизвикано од циклонот „Ели“, кој се приближува од југозапад, носејќи топол фронт што создава мешавина од снег и дожд – услови идеални за поледица.

Неповолните временски прилики веќе предизвикаа сериозни проблеми во сообраќајот. Забележани се бројни застои на патиштата и во железничкиот сообраќај, а поради силниот ветер и снег, денеска беа затворени училиштата во делови од северна Германија, меѓу кои Хамбург, Бремен и Долна Саксонија.

Во Долна Саксонија, кај местото Гехрде, утринава животот го загуби возач на автомобил кој, според полицијата, поради поледица изгубил контрола и удрил во дрво.

Сообраќајни несреќи поради лизгави коловози се пријавени и во други сојузни покраини. Во Тирингија, автопатот А73 беше делумно затворен по судир на три возила кај Шлојзинген.

Поради екстремните временски услови, владејачката Христијанско-демократска унија (ЦДУ) ја откажа својата редовна затворена конвенција, планирана за утре.

– Поради сериозните предупредувања и отежнатиот железнички и воздушен сообраќај, принудени сме да ја одложиме конференцијата – изјави портпаролката на ЦДУ, Изабел Фишер.

Германската метеоролошка служба апелира до граѓаните да ги одложат патувањата доколку не се неопходни и внимателно да се информираат пред поаѓање, особено кога станува збор за авионскиот сообраќај, каде што се можни и целосни затворања на аеродромите.

Надлежните служби ги повикуваат граѓаните да бидат крајно внимателни поради поледицата, додека болниците, особено трауматолошките одделенија, се подготвуваат за зголемен број повредени.