Во Соборниот храм на охридските архиепископи „Света Софија“ во Охрид денеска беше извршена епископска хиротонија на архимандритот Георгиј и негово устоличување на тронот на Дебарско-кичевската епархија, информираше премиерот Христијан Мицкоски кој присуствуваше на хиротонијата.
„Со тоа, тој и официјално станува митрополит на Дебарско-кичевската епархија. Верувам дека со сите сили и знаења ќе служи на нашата црква. Достоен е! На многаја лета“, напиша премиерот на Фејсбук.
Македонската православна црква – Охридска архиепископија (МПЦ-ОА) доби нов духовен водач за Дебарско-кичевската епархија вчера, на 12 јули, кога игуменот Георгиј(Ѓорѓиевски) едногласно, без ниту глас против, беше избран за митрополит на седница на Светиот архиерејски синод.
Георгиј има богата биографија и црковна кариера како богослов, диплмат, реформатор, автор на книги и трудови.
Со неговиот избор, Светиот архиерејски синод испраќа порака за консензус, стабилност и обновен фокус кон духовниот и образовен развој на верниот народ.
