Фри соло искачување на најпознатата кула во Тајван

Топ Вести - Слушај сега

Американскиот алпинист Алекс Хонолд изведе уште еден потфат што го остави светот без здив – без јажиња и без заштитна опрема се искачи на облакодерот „Тајпеј 101“, висок 508 метри.

- Advertisement -

Хонолд стигна до врвот на кулата за околу 90 минути, движејќи се по агол од зградата и користејќи мали метални изданоци и архитектонски елементи како единствени потпори. Облечен во црвена маица со кратки ракави, на самиот врв ги крена рацете над главата и им мавташе на стотиците луѓе кои го следеа искачувањето од плоштадот под зградата.

– Погледот беше неверојатен. Само си велев – не паѓај од кулата. Беше многу ветровито, па постојано морав да балансирам – изјави Хонолд по искачувањето, додавајќи дека тоа бил еден од највпечатливите начини да се види Тајпеј.

Најтешкиот дел од искачувањето, според него, бил средниот сегмент од зградата – таканаречените „бамбусови кутии“, кои го даваат препознатливиот изглед на облакодерот. Станува збор за 64 ката со стрмни и надвиснати делови, каде што Хонолд морал да маневрира по украсни конструкции, повремено правејќи кратки паузи на балконите.

Искачувањето беше пренесувано во живо на „Нетфликс“, со минимално 10-секундно задоцнување, а првично планираниот датум беше поместен за еден ден поради дожд.

За Хонолд, кој најчесто се искачува во оддалечени и ненаселени области, публиката претставувала дополнителен предизвик.

– На почетокот беше малку интензивно, толку многу луѓе те гледаат. Но, чувството беше речиси празнично. Сите навиваа и ми посакуваа среќа – рече тој.

Овој подвиг повторно ја отвори дебатата за ризикот и етиката на вакви екстремни искачувања во живо. Иако Тајпеј 101 и претходно бил искачуван, Хонолд е првиот човек што го направил тоа без јаже. Францускиот алпинист Ален Робер се искачи на зградата во 2004 година, но со безбедносна опрема.

Хонолд е светски познат по „фри соло“ искачувањето на карпата Ел Капитан во Националниот парк Јосемити, документарец што во 2018 година освои Оскар и го вброи меѓу најсмелите алпинисти на сите времиња.