Фордо го нема, сите авиони се вратија, рече Трамп

Американскиот претседател Доналд Трамп преку социјалната мрежа „Truth Social“ објави дека САД извршиле воздушен напад врз три нуклеарни постројки во Иран, вклучувајќи ја и главната локација – Фордо.

– Го завршивме нашиот многу успешен напад врз трите нуклеарни постројки во Иран, вклучувајќи ги Фордо, Натанз и Исфахан – рече Трамп.

Тој додаде дека „цел товар бомби“ бил фрлен на локацијата Фордо и потврди дека сите американски авиони се вратиле безбедно по нападот.

- Advertisement -

Во втора објава, Трамп драматично изјави: „Фордо го нема“.

Според американски извори, бомбардирањето е извршено откако бомбардери Б-2 биле распоредени на островот Гуам. Висок американски функционер потврди дека токму овие стелт бомбардери биле вклучени во операцијата против иранските нуклеарни капацитети.

Сè уште не е потврдено дали во нападот учествувале и израелски воени сили, но нападот значително го проширува опсегот на воените дејства на Блискиот Исток.

– Сега е време за мир – напиша Трамп на крајот од својата објава, навестувајќи можен пресврт по агресивната офанзива.