Осумнаесетта година по ред, Фондацијата „Трајче Мукаетов“ доделува 40 стипендии за студенти од Фармацевтскиот и Медицинскиот факултет при Универзитетот „Св. Кирил и Методиј“ во Скопје, продолжувајќи ја традицијата на поддршка за идните здравствени работници.
Изборот на стипендистите за академската 2025/2026 година е направен врз основа на јавниот конкурс и одобрен од Управниот одбор, по предлог на прелиминарните листи изготвени од комисиите во кои учествуваат претставници на Фондацијата, факултетите и студентите.
За новата академска година се доделуваат 40 нови стипендии, 20 за студенти на Фармацевтскиот и 20 за студенти на Медицинскиот факултет. Фондацијата и оваа година доделува и еднократна парична награда од 1.200 евра во денарска противвредност за првенците на генерација на двата факултета. Добитници на наградата се Исидора Давитковска од Фармацевтскиот факултет, која дипломирала со просек 9,77, и Јована Цветановска од Медицинскиот факултет, со просек 9,98. Двете се долгогодишни стипендистки на Фондацијата.
– Во време кога вештачката интелигенција станува неизбежен дел од секојдневието, важноста на човечкиот фактор, а особено на квалитетното образование, станува пресудна. Образованието не смее да се сведе само на технички вештини, треба да мотивира, да создава критичари, творци и решавачи на комплексни проблеми – изјави Живко Мукаетов, претседател на Фондацијата и генерален директор на „Алкалоид“ АД Скопје.
Тој нагласи дека зад секој напредок стои вложување во знаење и дека „Алкалоид“ денес успева на глобалниот фармацевтски пазар благодарение на континуираната поддршка и селективност во развојот на кадарот.
Фондацијата „Трајче Мукаетов“ во своето осумнаесетгодишно постоење стипендирала вкупно 739 студенти по фармација и медицина. Досега се инвестирани околу 151 милион денари во стипендии и еднократни награди за првенците на генерација.
Од ноември 2022 година, месечниот износ на стипендијата е 7.000 денари, доделувани 12 месеци годишно и пресметувани линеарно за сите постојни и нови стипендисти сѐ до нивното формално завршување на студиите.
