Најмалку една третина од анкетираните компании ги суспендирале или одложиле нарачките од не’рѓосувачки челик како директен резултат на американските увозни тарифи до 50%. Во исто време, повеќе од половина од нив активно ги преиспитуваат своите стратегии за снабдување, објави финската компанија за челик „Оутокумпу“.
Податоците укажуваат на значителни нарушувања на глобалниот пазар.
Кати тер Хорст, претседател и извршен директор на „Оутокумпу“, изјави дека забавувањето на глобалната побарувачка значи дека сегашните квоти за увоз на ЕУ се превисоки.
Таа очекува Европската комисија да објави нови мерки во октомври за ограничување на увозот на челик од конкурентите за да ги заштити домашните производители.
– Овие мерки ќе ги заменат постојните механизми за заштита што истекуваат следното лето и би можеле да стапат во сила еден квартал порано порано од планираното – вели тер Хорст.
Проблемот стана очигледен веќе во мај, кога една третина од компаниите беа принудени да ги сменат добавувачите на челик. Дополнително на неизвесноста за купувачите на опрема и машини беше проширувањето на американската листа на производи што подлежат на тарифи во август за да вклучи стотици деривати.
Пратениците на Европската унија моментално разгледуваат квоти за увоз и механизмот CBAM, што би наметнало трошок за емисиите на CO2 вградени во увезениот челик, како поттик за декарбонизација на индустријата. Иницијативата доаѓа во време кога „зелените“ проекти за челик низ Европа се одложени или откажани поради слабата побарувачка и високите трошоци за енергија.
И покрај сегашните предизвици долгорочните трендови за не’рѓосувачки челик остануваат позитивни. Клиентите сè повеќе го гледаат како поодржлив и поиздржлив материјал од обичниот челик, надевајќи се дека ќе ги намалат годишните трошоци за корозија, проценети на 2,5 трилиони долари глобално, и ќе ги исполнат климатските цели.
Зголемувањето на трошоците за одбрана, исто така, го поддржува овој позитивен тренд.
