ЕВРОПСКИТЕ БАНКАРИ СЕ ИСПЛАШИЈА ОД МЕЃУНАРОДНАТА КОНКУРЕНЦИЈА

Централните банки на најголемите европски економии – Германија, Франција, Италија и Шпанија ја повикаа Европската комисија (ЕК) да ја намали регулативата и да ги поедностави банкарските правила за да можат да се натпреваруваат со меѓународната конкуренција.

Банкарите, во заедничко писмо до ЕК, бараат да се обезбеди „рамноправно поле за игра“ со другите големи јурисдикции.

„Веруваме дека приоритет сега треба да биде да се развие сеопфатна проценка на правилата што важат за европските банки. Анализата ќе послужи да се идентификуваат областите каде што европската рамка е претерано сложена и може да создаде нарушувања на конкуренцијата на меѓународно ниво, без никакви значителни придобивки за финансиската стабилност“, напишаа гувернерите  на четирите земји.

- Advertisement -

Тие тврдат дека не повикуваат на дерегулација, но нивната жалба веројатно ќе им се допадне на некои политичари кои тврдат дека сложените банкарски правила го ограничуваат економскиот раст.

Претставник на Европската комисија го потврди приемот на писмото.

Инаугурацијата на Доналд Трамп како претседател на САД ги охрабри финансиските директори низ светот да бараат укинување на голем број регулативи кои беа воведени по финансиската криза во 2008 година.